Pumpene med B30 - diesel med 30 prosent innblanda biodiesel - er førebels å finne i Trondheim, Stavanger og på Bækkelaget utanfor Oslo. YX har ingen konkrete planar for vidare utbygging, men presiserer at dei sjølvsagt har tankar for framtida.
- Til liks med fleire andre selskap er vi inne i ein prøveperiode. Me ynskjer finne ut av etterspurnaden og korleis dette fungerer i praksis, seier marknadssjef i YX, Odd Salberg.
Den siste tida har det vore stor merksemd kring biodiesel, og stadig fleire selskap kjem på bana. Ofte har satsinga på innføring av drivstoffet diverre stoppa opp i eitt eller fleire ledd.
- Ei av utfordringane er at både leverandørar og bilprodusentar må bli trygge på denne satsinga, held Salberg fram.
Peugeot Norge er eit unntak i denne rekka, og har no godt nytt til sine miljømedvitne kundar:
- Absolutt alle dieselbilane våre kan køyre på B30! Men, det er viktig å påpeike at det må vere EU-godkjent biodiesel, seier importør Frank Vatne.
Bjørn Gunnar Brodersen frå Citroën svarer med same mynt:
-Ja, alle våre dieselbilar kan òg køyre på B30.
Vatne frå Peugot meiner bilbransjen blir stadig meir opptatt av miljø, og konkurransen på feltet aukar.
- Ja, bilbransjen har verkeleg gjort heilomvending i måten å tenke på. Bilutstillinga i Frankfurt nyleg syner at bransjen tar miljø på alvor.
Han legg til at Peugeot stiller med ein spanande diesel-hybrid, ein bil som kombinerer straum og diesel.
- Dersom alt går etter planen, kan den vere på den norske marknaden i 2009, avsluttar Vatne.
Renault har òg meldt si interesse på miljøfronten, og melder at frå og med neste år skal halvparten av alle nye Renaultar gå på B30 eller E85 (Etanol).
Tal henta frå Opplysningsrådet for vegtrafikk viser at salet av dieselbilar aukar enormt. I første halvår av 2007 var andelen på
75 prosent i favør diesel.
